ULMA Enkofratuak Filipinetako azpiegitura handi baterako
Cebu Cordova Link Expressway abian jarriz, lotura berri bat sortuko da Cebuko industria eremuaren eta Mactango Nazioarteko Aireportuaren artean, baita Cordovako hiri garapen berriekin ere, tokiko ekonomiarako egituratze kanal bat eta elementu dinamizatzaile bat izango baita.
Guztira 8,25 km luze eta 27 m zabal izango da, Cebu-Cordova lotuneko autobideak bi errei izango ditu norabide bakoitzean, egunero 40.000 ibilgailu ingururi zerbitzua emateko.
Cebu eta Cordova hiriak, uraren gainean, lotzen dituen azpiegiturarik handiena da. 650 metroko tirante zubi baten diseinua eta eraikuntza da, zeinak pilonoen artean 390 metroko bao nagusi bat izango duen. Proiektuan, halaber, hainbat biaduktu eta ezponda baten gaineko 5,2 kilometroko galtzada zati bat ere egingo dira.
ULMAk konplexutasun teknikoko egiturak garatu ditu proiektu honetarako: pilonoak, tiranteak jartzeko lan plataformak, pilareak eta baoburuak, zero dobelak, eta baita proiektuko baoburu haberik garrantzitsuena ere, haien tamainagatik, berezitasun teknikoagatik eta gauzatu diren bitartean egon den trafiko interferentziagatik.
Proiektuak bi pilono oktogonal ditu, aldakorrak aurpegi guztietan, eta 150 metroko altuera. ATR sistema autoigokariarekin ez da soilik pilonoen altuerarako eta geometriarako konponbidea bilatu; egokia izan da, baita ere, Magallanes Cebura iritsi zeneko unea gogoratzeko hormigoian sartuta jarri den 50 metroko metalezko gurutze apaingarrira moldatzeko. Era berean, sistemaren malgutasunari esker, horman sartutako tirante kutxetara moldatu da hormigoitze prozesuan. 3. Fasean pilonoen barruan egon den interferentzia garrantzitsua izan da, irtenbidearen hasierako diseinuan ere aurreikusi zena. Sistema hori erabiliz, garabia beste lan osagarri batzuetarako erabili ahal izan da, burdinlari lanak egiteko, esaterako.
Sistema guztiak langileen segurtasuna eta erosotasuna eta prozesuaren produktibitatea kontuan hartuta diseinatu dira. Izan ere, lan plataforma erabat itxiak zituzten, eta, horri esker, inguru horretan ohikoak diren muturreko haize baldintzetan egin ahal izan dute lana. ATR sistema autoigokariak, bi pilono horien eskakizunetara egokitzeko bereziki diseinatuak, hiru lan plataforma izan ditu. Kargak transmititzeko, burdinlari lanak egiteko eta enkofratua atzera eramateko plataforma nagusia; sistema hidraulikoa dagoen tarteko plataforma, eta konoak berreskuratzeko plataforma.
Gainera, enkofratuak berak lan plataformak izan ditu une oro langileen segurtasuna bermatzeko.
Enkofratuaren azken soluzioa hiru fasetan banatu eta diseinatu da:
- 1. fasea: zimenduetatik lauzazko taularaino (44,27 m)
- 2. fasea: lauzazko taulatik zeharkako sekzioaren hasieraraino (50,18 m)
- 3. fasea: zeharkako sekzioaren hasieratik gailurreraino (41 m)
Lan prozesuen plangintzak gauzatze erritmoak hobetzea ekarri du: 5 metroko altuerako geruzak asteko zikloetan.
Zubia eraikitzeko obren hurrengo fasea tiranteak instalatzea izan da, bi pilonoak zubiaren taulari lotzeko. Horretarako, ULMAk BMK plataformak hornitu ditu, pilonoen 3. fasean kableak jartzeko eta tenkatzeko lanak errazteko.
Cebuko hegoaldeko kostaldeko errepidea (CSCR) zubi nagusiarekin lotzeko, teknikoki goi mailako ezaugarriak dituen baoburuko habe bat behar izan da bermatzeko. ULMAko ingeniaritza taldeak MK sisteman oinarritutako soluzio bat proposatu du 45 metroko sekzio karratuko habe bat egiteko, bi pilareren gainean eta 8,3 metroko hegalekin.
ULMAko langileen presentzia etengabea izan da proiektu honetan, eta bezeroari egunero eta proiektuaren hasieratik lagundu zaio, edozein kontsulta teknikotarako denbora errealean irtenbideak emanez.
